ორმხრივი ურთიერთობები

დიპლომატიური ურთიერთობების ქრონოლოგია:

დიპლომატიური ურთიერთობები საქართველოსა და ირლანდიას შორის დამყარდა 1996 წლის 12 სექტემბერს.

საქართველოს საელჩო ირლანდიაში 2011 წელს გაიხსნა და დაინიშნა საქმეთა დროებითი რწმუნებული. ქვეყნებს შორის გააქტიურებული ურთიერთობების ფონზე, ქართულმა მხარემ მიიღო გადაწყვეტილება რეზიდენტი ელჩის დანიშვნის შესახებ. 2019 წლის 31 ოქტომბრიდან გიორგი ზურაბაშვილი გახდა საქართველოს საგანგებო და სრულუფლებიანი ელჩი ირლანდიაში.

თანამშრომლობის ძირითადი სფეროები:

საქართველოსა და ირლანდიას შორის არსებული ურთიერთობები ბოლო წლების განმავლობაში მნიშვნელოვნად გააქტიურდა, რასაც გარკვეულწილად, ბიძგი მისცა დუბლინში საქართველოს საელჩოს გახსნამ.

2021 წელს აღინიშნა ორ ქვეყანას შორის დიპლომატიური ურთიერთობების დამყარების 25 წლისთავი. საიუბილეო თარიღთან დაკავშირებით, გამოიცა საფოსტო მარკა, რომელიც 2022 წლის 10 მარტიდან არის მიმოქცევაში, ასევე, დაინიშნა საქართველოს პირველი საპატიო კონსული ირლანდიაში - ცნობილი იურისტი და ბიზნეს არბიტრი ჯეიმს ბრიჯმანი.

განსაკუთრებული აღნიშვნის ღირსია ირლანდიის პრინციპული პოზიცია საქართველოს ტერიტორიული მთლიანობისა და ევროპული ინტეგრაციის მიმართ, რის მანიფესტაციასაც წარმოადგენს ქვეყნის საკანონმდებლო ორგანოს მიერ 2017-2022 წლებში მიღებული საქართველოს მხარდამჭერი 4 რეზოლუცია.

2022 წლის 14 ივნისს, ირლანდიის სენატმა მიიღო საქართველოს მხარდამჭერი მორიგი რეზოლუცია, რომლითაც იგი მოუწოდებს ევროკავშირს, მიანიჭოს საქართველოს ევროკავშირის კანდიდატი ქვეყნის სტატუსი. სენატი მხარს უჭერს, ევროკავშირის გაფართოებას ევროპული ნორმებისა და ღირებულებების მქონე იმ ქვეყნების გაწევრიანებით, რომლებიც პირნათლად ასრულებენ ევროკავშირის წინაშე ნაკისრ ვალდებულებებს და აგრძელებენ ძალისხმევას ევროინტეგრაციის გზაზე. რეზოლუციაში აღნიშნული ის პროგრესი, რომელსაც საქართველომ მიაღწია ევროკავშირში ინტეგრაციის გზაზე და ხაზგასმულია, რომ გეოპოლიტიკური კონტექსტის გათვალისწინებით, კრიტიკულად მნიშვნელოვანია, რომ ასოცირებული ტრიოს წევრი ქვეყნების მიმართ იყოს ერთიანი მიდგომა.

საქართველოსა და ირლანდიას შორის სახელშეკრულებო-სამართლებრივი ბაზა მოიცავს 2 შეთანხმებას და არეგულირებს თანამშრომლობას საჰაერო ტრანსპორტის, ორმაგი დაბეგვრის თავიდან აცილებისა და გადასახადების გადაუხდელობის აღკვეთის სფეროებში.

ორი ქვეყნის ურთიერთობებში მნიშვნელოვან როლს თამაშობს საპარლამენტო თანამშრომლობა. აქტიურად ხორციელდება ვიზიტების ურთიერთგაცვლა. საქართველოს და ირლანდიის საკანონმდებლო ორგანოებში ფუნქციონირებს საპარლამენტო მეგობრობის ჯგუფები. 2017 წლის ნოემბერში, ირლანდიის პარლამენტში ჩამოყალიბდა საქართველოსთან მეგობრობის ჯგუფი, რომელსაც 2020 წლის ოქტომბრიდან ხელმძღვანელობს სენატორი დიარმუდ უილსონი.

ბოლო წლებში, საგრძნობლად გააქტიურდა სავაჭრო-ეკონომიკური და სექტორული თანამშრომლობა. ორ ქვეყანას შორის ეკონომიკური ურთიერთობების მზარდ დინამიკაზე მეტყველებს საქართველო-ირლანდიის ბიზნეს-საბჭოს ჩამოყალიბება, რომლის საინაუგურაციო სხდომაც 2021 წლის 25 ივნისს, ვირტუალურ ფორმატში გაიმართა. საბჭოში გაწევრიანდნენ ირლანდიის წამყვანი კომპანიების და აკადემიური წრეების წარმომადგენლები. ორგანიზაციას უხელმძღვანელებს ცნობილი ბიზნეს არბიტრი, საქართველოს საპატიო კონსული ჯეიმს ბრიჯმანი.

ქვეყნებს შორის ჩამოყალიბებული მეგობრული ურთიერთობების გათვალისწინებით, საქართველო უკვე ტრადიციულად ერთვება წმ. პატრიკის დღესასწაულთან დაკავშირებულ აქციაში “Global Greening” და 17 მარტს, თბილისის ანძა დღესასწაულის აღსანიშნავად, მწვანედ ნათდება.

2015 წლის აგვისტოში, დუბლინისა და ბათუმის პორტებს შორს გაფორმდა ურთიერთგაგების მემორანდუმი, რომელიც გულისხმობს გამოცდილების გაზიარებას ისეთ სფეროებში, როგორიც არის მართვა და სერვისები, საპორტო ქალაქის ინფრასტრუქტურის დაგეგმარება და განვითარება, ინვესტიციების მოზიდვა და საერთაშორისო პროექტების მხარდაჭერის მობილიზება.
გაღრმავდა კონტაქტები ორი ქვეყნის საგანმანათლებლო ინსტიტუტებს შორის. დუბლინის საუნივერსიტეტო კოლეჯმა (University College Dublin) და თბილისის სახელმწიფო უნივერსიტეტმა 2015 წლის 25 ივნისს გააფორმეს ურთიერთგაგების მემორანდუმი.

აღსანიშნავია რეგიონთაშორისი თანამშრომლობის გააქტიურება და დაძმობილების კუთხით გადადგმული ნაბიჯები. 2014 წელს, თბილისის მერის დავით ნარმანიას დუბლინში ვიზიტის ფარგლებში, ხელი მოეწერა მემორანდუმს თბილისისა და დუბლინის დამეგობრების შესახებ.
2016 წელს, კორკის საგრაფოს ხელმძღვანელობის აჭარაში ვიზიტის დროს, ხელი მოეწერა ურთიერთგაგების მემორანდუმს აჭარის ავტონომიურ რესპუბლიკასა და კორკის საგრაფოს (County Cork) „დაძმობილებასთან“ (ე.წ. twinning) დაკავშირებით. 

ბმულები:

ირლანდიის საელჩო საქართველოში (რეზიდენციით სოფია)

ირლანდიის საგარეო საქმეთა და ვაჭრობის დეპარტამენტი

ირლანდიის ოირექტასი (პარლამენტი)

ირლანდიის პრემიერ-მინისტრის ოფისი