საქართველოს მოქალაქეთა საყურადღებოდ! გაცნობებთ, რომ საელჩოს/საკონსულო სამსახურის ადგილობრივი სატელეფონო კავშირი (ტელ: 019059575) მუშაობს შეფერხებით ტექნიკური სამუშაოების გამო. თუ ვერ ახორციელებთ სატელეფონო ზარს ზემოთ მოცემულ ნომერზე, გთხოვთ, დაგვიკავშირდეთ შემდეგ ნომერზე: 0873427472 (ორშაბათიდან პარასკევის ჩათვლით 15:00-17:00 სთ-ებში)

დღეს, 2024 წლის 27 სექტემბერს საქართველოს ეროვნული დროშა დაშვებულია დუბლინში საქართველოს საელჩოში, სოხუმის დაცემის ტრაგიკული დღის 31 წლისთავთან დაკავშირებით. 1993 წლის 27 სექტემბერს, სოხუმი და საქართველოს განუყოფელი, ძირძველი რეგიონი - აფხაზეთი ხელში ჩაიგდეს რუსეთის სამხედრო შენაერთების მიერ მხარდაჭერილმა არალეგალურმა სამხედრო დაჯგუფებებმა.

20 სექტემბერს, ირლანდიაში საქართველოს საელჩომ მონაწილეობა მიიღო კულტურის საღამოში (Culture Night), რომელიც ყოველწლიურად, მთელი ქვეყნის მასშტაბით იმართება. კულტურის საღამოს ფარგლებში, ტრადიციულად, ქვეყანაში მოქმედი კულტურულ-საგანმანათლებლო დაწესებულებები: მუზეუმები, ბიბლიოთეკები, თეატრები, უნივერსიტეტები და საკონცერტო დარბაზები სხვადასხვა სახის კულტურულ ღონისძიებებს მართავენ.

2024 წლის 14 აგვისტოს, გაერო-ს უშიშროების საბჭომ, დახურულ სხდომაზე, რუსეთ-საქართველოს ომის მე-16 წლისთავთან დაკავშირებით, რუსეთის მიერ ოკუპირებულ საქართველოს ტერიტორიებზე არსებული ვითარება და რუსეთ-საქართველოს კონფლიქტის საკითხი განიხილა.

ძვირფასო მოქალაქეებო, საგარეო საქმეთა სამინისტროს ერთ-ერთ მთავარ პრიორიტეტს წარმოადგენს საზღვარგარეთ მყოფი თანამემამულეების კანონიერი უფლებებისა და ინტერესების დაცვა. სამინისტრო მისი კომპეტენციის ფარგლებში, მაქსიმალურად ზრუნავს, რომ საზღვარგარეთ მყოფმა საქართველოს მოქალაქეებმა შეძლონ თავიანთი საარჩევნო უფლების რეალიზება. აღნიშნულის გათვალისწინებით, სამინისტროს ოფიციალურ ვებ-გვერდზე ამოქმედდა საკონსულო აღრიცხვის ელექტრონული რეესტრი: https://www.geoconsul.gov.ge/electronic-register/el-registry, რომლის მეშვეობითაც საზღვარგარეთ მყოფ საქართველოს მოქალაქეებს, უკვე აქვთ შესაძლებლობა, მარტივად გადაამოწმონ მათი საკონსულო აღრიცხვაზე ყოფნის ფაქტი და სურვილის შემთხვევაში, დროულად დადგნენ საკონსულო აღრიცხვაზე, რათა მათი მონაცემები აისახოს ამომრჩეველთა ერთიან სიაში.

საქართველოს აფხაზეთისა და ცხინვალის რეგიონების უკანონო ოკუპაციის მიზნით, რუსეთის ფედერაციის მიერ საქართველოში განხორციელებული ფართომასშტაბიანი სამხედრო ინტერვენციის შედეგად დაღუპულთა ხსოვნის პატივის მიგების ნიშნად, დღეს, 2024 წლის 8 აგვისტოს ირლანდიაში საქართველოს საელჩოში დაშვებულია საქართველოს სახელმწიფო დროშა.

2024 წლის 12 ივლისს, თბილისში, „ახალგაზრდა ელჩების ამბასადორიალი 2024“ გაიმართა. ღონისძიებაზე დამსწრეებს მისასალმებელი სიტყვით მიმართეს საქართველოს საგარეო საქმეთა მინისტრის მოადგილემ, ვლადიმერ კონსტანტინიდიმ, აფხაზეთის ავტონომიური რესპუბლიკის მთავრობის თავმჯდომარემ რუსლან აბაშიძემ და მიგრაციის პოლიტიკის განვითარების საერთაშორისო ცენტრის (ICMPD) პროექტის მენეჯერმა ქეთევან გორგოშიძემ.

საქართველოს შინაგან საქმეთა სამინისტროს, ირლანდიის ტრანსპორტის სამინისტროსა და ირლანდიის საგზაო უსაფრთხოების ორგანოს შორის ხელი მოეწერა ურთიერთგაგების მემორანდუმს მართვის მოწმობების გადაცვლის შესახებ.

·         დღეს, ჩვენ აღვნიშნავთ საქართველო - ევროკავშირს შორის ასოცირების შეთანხმების ხელმოწერიდან 10 წლის იუბილეს. ·         2014 წლის 27 ივნისს, ასოცირების შესახებ შეთანხმების გაფორმებით, საქართველო-ევროკავშირის ურთიერთობები თვისობრივად ახალ ეტაპზე გადავიდა. ასოცირების შესახებ შეთანხმება წარმოადგენს საქართველო-ევროკავშირის თანამშრომლობის მთავარ სამართლებრივ ჩარჩოს. ·         ასოცირების შეთანხმება საქართველოს დემოკრატიის, თავისუფალი და კონკურენტული ეკონომიკის პრინციპებითა და რეფორმირებით შემდგარ და ამ პროცესში ევროკავშირის მხარდაჭერის დეტალურ და დროში კარგად გაწერილ გეგმას წარმოადგენს, რაც ასევე, მოიცავს ღრმა და ყოვლისმომცველი თავისუფალი ვაჭრობის სივრცის კომპონენტს (DCFTA).

2024 წლის 4 ივნისს, ნიუ-იორკში, გაერო-ს გენერალურმა ასამბლეამ, 78-ე სესიის ფარგლებში,მიიღო საქართველოსა და მსოფლიოს სხვადასხვა რეგიონის 63 ქვეყნის მიერ ინიცირებული რეზოლუცია - „აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ“. რეზოლუციას 103-მა ქვეყანამ დაუჭირა მხარი. 

ირლანდიაში საქართველოს საელჩოსა და დუბლინის მერიის ორგანიზებით, საქართველოს დამოუკიდებლობის დღის აღსანიშნავად, ტრადიციულად ქართული დროშის ფერებში განათდა დუბლინის Samuel Beckett ხიდი, ასევე 21-27 მაისს დუბლინის ცენტრში გამოიფინა ქართული დროშები.

2024 წლის 11 მაისს, ირლანდიაში საქართველოს საელჩოს საკონსულოს წარმომადგენლები, ქ. კორკში მოქმედ ქართულ საკვირაო სკოლას- „ფესვებს” ეწვივნენ და საქართველოს საგარეო საქმეთა სამინისტროს მიერ მოწოდებული სასკოლო სახელმძღვანელოები გადასცეს.