ორმხრივი ურთიერთობები

დიპლომატიური ურთიერთობების ქრონოლოგია

დიპლომატიური ურთიერთობები საქართველოსა და ირლანდიას შორის დამყარდა 1996 წლის 12 სექტემბერს.

საქართველოს საელჩო ირლანდიაში 2011 წელს გაიხსნა და დაინიშნა საქმეთა დროებითი რწმუნებული. ქვეყნებს შორის გააქტიურებული ურთიერთობების ფონზე, ქართულმა მხარემ მიიღო გადაწყვეტილება რეზიდენტი ელჩის დანიშვნის შესახებ.

ირლანდია გადაფარვას ახორციელებს ბულგარეთის რესპუბლიკიდან.

თანამშრომლობის ძირითადი სფეროები

საქართველოსა და ირლანდიას შორის არსებული ურთიერთობები ბოლო წლების განმავლობაში მნიშვნელოვნად გააქტიურდა, რასაც გარკვეულწილად, ბიძგი მისცა დუბლინში საქართველოს საელჩოს გახსნამ. პოზიტიური დინამიკის კვალდაკვალ, აღსანიშნავია 2023 წელს, საქართველოს საგარეო საქმეთა მინისტრის ვიზიტი ირლანდიაში, 13-წლიანი პაუზის შემდეგ. ვიზიტის ფარგლებში, ხელი მოეწერა ურთიერთგაგების მემორანდუმს საგარეო საქმეთა სამინისტროებს შორის, რამაც მოახდინა არსებული თანამშრომლობის ინსტიტუციონალიზაცია და თვისობრივად ახალ ნიშნულზე გადაიყვანა ორმხრივი ურთიერთობები.

2021 წელს, აღინიშნა ორ ქვეყანას შორის დიპლომატიური ურთიერთობების დამყარების 25 წლისთავი. საიუბილეო თარიღთან დაკავშირებით, გამოიცა საფოსტო მარკა, რომელიც 2022 წლის 10 მარტიდან არის მიმოქცევაში, ასევე, დაინიშნა  საქართველოს პირველი საპატიო კონსული ირლანდიაში.  

ორი ქვეყნის ურთიერთობებში მნიშვნელოვან როლს თამაშობს საპარლამენტო თანამშრომლობა. აქტიურად ხორციელდება ვიზიტების ურთიერთგაცვლა. საქართველოს და ირლანდიის საკანონმდებლო ორგანოებში ფუნქციონირებს საპარლამენტო მეგობრობის ჯგუფები.

განსაკუთრებული აღნიშვნის ღირსია ირლანდიის პრინციპული პოზიცია საქართველოს ტერიტორიული მთლიანობისა და ევროპული ინტეგრაციის მიმართ, რის მანიფესტაციასაც წარმოადგენს ქვეყნის საკანონმდებლო ორგანოს მიერ 2017-2022 წლებში მიღებული საქართველოს მხარდამჭერი 4 რეზოლუცია.

2022 წლის 14 ივნისს, ირლანდიის სენატმა მიიღო საქართველოს მხარდამჭერი მორიგი რეზოლუცია, რომლითაც იგი მოუწოდებს ევროკავშირს, მიანიჭოს საქართველოს ევროკავშირის კანდიდატი ქვეყნის სტატუსი.

საქართველოსა და ირლანდიას შორის სახელშეკრულებო-სამართლებრივი ბაზა არეგულირებს თანამშრომლობას საჰაერო ტრანსპორტის და საგადასახადო სფეროებში. 

ბოლო წლებში, საგრძნობლად გააქტიურდა სავაჭრო-ეკონომიკური და სექტორული თანამშრომლობა. ორ ქვეყანას შორის ეკონომიკური ურთიერთობების მზარდ დინამიკაზე მეტყველებს 2021 წელს საქართველო-ირლანდიის ბიზნეს-საბჭოს ჩამოყალიბება. საბჭოში გაწევრიანდნენ ირლანდიის წამყვანი კომპანიების და აკადემიური წრეების წარმომადგენლები.

საქართველოს მზარდ ცნობადობაზე მეტყველებს ირლანდიური მხარის გადაწყვეტილება, საქართველოს საელჩოს სიახლოვეს არსებულ ტრანსპორტის (ავტობუსის) გაჩერებას ეწოდოს „საქართველოს საელჩოს“ სახელი (Embassy of Georgia bus stop).

2015 წლის აგვისტოში, დუბლინისა და ბათუმის პორტებს შორს გაფორმდა ურთიერთგაგების მემორანდუმი, რომელიც გულისხმობს გამოცდილების გაზიარებას ისეთ სფეროებში, როგორიც არის მართვა და სერვისები, საპორტო ქალაქის ინფრასტრუქტურის დაგეგმარება და განვითარება, ინვესტიციების მოზიდვა და საერთაშორისო პროექტების მხარდაჭერის მობილიზება.

გაღრმავდა კონტაქტები ორი ქვეყნის საგანმანათლებლო ინსტიტუტებს შორის. დუბლინის საუნივერსიტეტო კოლეჯსა (University College Dublin) და თბილისის სახელმწიფო უნივერსიტეტს შორის გაფორმებულია ურთიერთგაგების მემორანდუმი.

აღსანიშნავია რეგიონთაშორისი თანამშრომლობის გააქტიურება და დაძმობილების კუთხით გადადგმული ნაბიჯები. 2014 წელს, თბილისის მერის დუბლინში ვიზიტის ფარგლებში, ხელი მოეწერა მემორანდუმს თბილისისა და დუბლინის დამეგობრების შესახებ. 2016 წელს, კორკის საგრაფოს ხელმძღვანელობის აჭარაში ვიზიტის დროს, ხელი მოეწერა ურთიერთგაგების მემორანდუმს აჭარის ავტონომიურ რესპუბლიკასა და კორკის საგრაფოს (County Cork) „დაძმობილებასთან“ (ე.წ. twinning) დაკავშირებით.